نہ پوڈر شوڈر لیندی ہے

جٹی

: نہ پوڈر شوڈر لیندی ہے

نہ فیشنی برقعے پیندی ہے

نہ اکھیں پھیرنڑ سکھی ہے

نہ نخرے ناز کریندی ہے

سٹ منہ تے پانی دا چھٹا

اے چھیٹ کوں کھڑ ٹھمکیندی ہے

ہس نفرت خاص بناوٹ توں

نہ رنگت غرق کریندی ہے

کھا چٹڑیں وقت گزاریا ہس

سرتاج کوں نہ زلتیندی ہے

ایکوں شوق مدینہ ڈیکھنڑ دا

نہ فلماں ڈیکھنڑ ویندی ہے

ایندے حق ہمسائے سنجڑیندے نئیں

ایندی عادت محض پرانڑی ہے

جٹی دی ذات سیانی ہے

پیغام اے سچا مچا ہے

جٹی دا درجہ اچا ہے

اوبخشیا ویسی جیں کھادا

ایں سئینڑ دا بچا کھچا اے

میں اے سمجھینداں جنت تیں

حق ایندا نرا ُنچا ہے

ایں چپ چا کیتی مڑس ایندا

توڑے چندرا، چچرا، چچا ہے

ایں اپنے دل دے برتن کوں

ہنج پی کے مانجھا کچا اے

ناں ایندا پوپا کچا ہے

نہ ایندا لچھا لچا ہے

ہے شاباش جٹی کوں شفقت

ایں شرم دی تنڑی تانڑی ہے

جٹی دی ذات سیانڑی ہے

سئیں شفقت بزدار صاحب